તમે પાર્ટીમાં હતા ?

29 11 2021
love


આજે અમલ ખૂબ ખુશ હતો. તેના જોડિયા ભાઈ ની પરીક્ષા હતી. મમ્મી અને 
પપ્પા તેમના મિત્રની ૨૫ મી લગ્ન તિથી મનાવવા કૈનકુન ગયા હતા. આખા ઘરમાં
અમલા ભાઈ એકલા હતા. અજય પરીક્ષા પછી મિત્રો સાથે  ગેલ્વેસ્ટન બે દિવસ 
જવાનો હતો,  મનમાં લડ્ડુ ફૂટતા હતા. શુક્રવારની સાંજ વિચારમાં ગાળી. મોડી રાતે
સાતેક મિત્રો ને પાર્ટી માટે આમંત્રણ આપી દીધું.

 
બે વર્ષ પહેલાં ૨૧મી વર્ષગાંઠ ધામધુમથી ઉજવી હતી. એટલે છાંટોપાણી કરવામાં
કોઈ બાધ ન હતો. અમલની મમ્મીના રાજમાં ઘરમાં ઘણું ગમતું ખાવાનું હોય. દરેકને
કહી દીધું શું લઈને આવવાનું છે. પપ્પાના બિયર પણ ઘરમાં હતા. અમલે પોતાની મિત્રને
બોલાવી. હવે આવી પાર્ટીની મજા માણવાનું કોણ ચૂકે ?


અમલને હતું દસેક જણા થશે. જવાની દિવાની હોય, દરેક મિત્ર પોતાની સાથે એક મિત્ર 
લઈને આવ્યો. અમલ હવે મુંઝાય. ના પણ કેવી રીતે પડાય. ઘર મોટું મેનશન હતું. દરેકને 
ખાસ  ચેતવણી આપી કે ‘ફેમિલી રૂમ ‘ સિવાય ક્યાંય જવાનું નહી. કિચન અને ફેમિલી 
રૂમ બાજુ બાજુમાં હતા.

જોરદાર સંગીત ચાલુ કર્યું. અમુક મિત્રોને અમલ ઓળખતો પણ ન હતો. મિત્રના મિત્ર

બધાની સાથે ઓછો સંબંધ હોય ? ખેર હવે પરિસ્થિતિ કાબૂ બહાર થઈ ગઈ હતી. ન

બોલવામાં માલ હતો.


મોડે સુધી બધા ખાધું અને પીધું. પછી તો છોકરીઓ પણ હતી એટલે નૃત્યનો કાર્યક્રમ લાંબો
ચાલ્યો. ઓચિંતો અમલના પપ્પાનો ફોન આવ્યો. 

ફોનમાં અવાજ સાંભળીને, ‘બેટા શું ચાલે છે’? 

‘પપ્પા મારા મિત્રો આવ્યા છે. ‘
‘બહુ ધમાલ નહી કરતા’. 
‘સારું પપ્પા’. 
રાતના બે વાગ્યા, અજાણ્યા મિત્ર ચાલી ગયા, જાણીતા રાત રહેવાના હતા.  અચાનક ત્રણેક 
જણા પાછા આવ્યા. અમલ તો બેભાન હાલતમાં હતો. સવારે ઉઠીને બધા એક પછી એક વિદાય
 થઈ ગયા.

અમલ બે કપ કડક બ્લેક કોફી પીધી ત્યારે હોશમાં આવ્યો. ઘરની હાલત જોઈને હેરાન થઈ ગયો.
બે ખાસ મિત્રો હતા તેમણે છેલ્લે સુધી  મદદ કરી. અચાનક અમલ નું ધ્યાન ગયું, પપ્પાનું ‘લેપ ટોપ’

અને ‘આઈ પેડ’ ગુમ થયેલા લાગ્યા.

અમલના મિત્રો કહે ,’કોને ખબર કોણ લઈ ગયું હશે’?
અમલ બધાને ઓળખતો પણ ન હતો. ખૂબ ગભરાયો. હવે તો એકલા પપ્પા નહી, મમ્મી પણ વઢશે. 
બે દિવસ પછી પપ્પા અને મમ્મી આવ્યા. અમલે વાત કરી. પપ્પા શાણા અને સમજુ હતા.
અમલને કહે, આપણા ઘરમાં , સી.સી. કેમેરા  છે’. જેણે ચોરી કરી હશે તે પકડાશે.  ‘

અમલ કહે, ‘પપ્પા તમને અમારી ધમાલ ન દેખાય એટલે મેં સી સી કેમેરા બંધ રાખ્યો હતો.’ 


પપ્પા હસીને કહે , ‘તારા મિત્રો ને ક્યાં ખબર છે’ કેમેરા બંધ હતો”. 

  
અમલ સમજી ગયો. મિત્રોને “ગ્રુપ ચેટ’ કર્યું, ‘શનીવારની પાર્ટીમાં આવેલા સહુને જણાવવાનું કે 
મારા ઘરમાંથી લેપ ટોપ અને આઈ પેડ ચોરાયા છે. ઘરમાં સી. સી. કેમેરા છે. જો અમે પકડશું તો
પોલીસ જણાવીશું. કાલ સવાર સુધીમાં પાછું મૂકી જજો. ‘


બરાબર સવારે અમલના પપ્પા એ બારણું ખોલ્યું તો નજર માની ન શકે એવું દૃશ્ય જોયું.

 
લેપ ટોપ અને આઈ પેડ બન્ને સુંદર બેગમાં કોઈ મૂકી ગયું હતું. .  





જાન બચાવ્યા !

23 11 2021
lady

રોહિત ઘરે આવી પહોંચ્યો, ત્યારે તેની આંખો કહ્યું માનતી ન હતી.

ઘરના ડ્રાઈવ વે માં પોલિસની ગાડી ઉભી હતી . માંડ માંડ પોતાની

જાત પર કાબૂ મેળવવાનો પ્રયત્ન કરી રહ્યો. મગજ દોડવા માંડ્યું,

‘શું મારી વહાલી મમ્મીને કાંઈ થયું ? રોહિતની મમ્મી ગામથી થોડા

વખત પહેલાં જ ગામથી આવી હતી. પાંચ વર્ષ પછી ઘરમાં બીજા

બાળકના આવવાની તૈયારી હતી. ‘ખૂબ ગભરાઈ ગયો. તેનું દિમાગ

શૂન્ય થઈ ગયું.

” પોલિસની ગાડી અને તે પણ પોતાના ઘરની બહાર” ?

ગરાજમાંથી ઘરમાં આવ્યો. દૃશ્ય જોઈને આંખો માની ન શકી. આજે

કામ વહેલું પત્યં હતું એટલે ઘરે વહેલો આવ્યો હતો. રાજ હજુ શાળાની

બસ આવી ન હતી, તેથી ઘરે આવ્યો ન હતો.

રોહિતની મમ્મી ખૂણામાં એકદમ ગભરાયેલી ઉભી હતી. રોમા જમીન

પર બેભાન હતી. એમ્બ્યુલન્સના આવવાની રાહ જોઈ રહ્યા હતા. રોહિતે

પોલિસની સામે જોયું.

એ લોકોને થયું , આ ઘરનો માલિક લાગે છે. કહ્યું કે’ ૯૧૧ ફોન કરીને અમને

બોલાવ્યા. તમારી પત્ની જમીન પર લપસી ગઈ હતી. તમારી માને ઈંગ્લીશ

આવડતું નથી. ખાલી ‘ ઈમરજ્નસી’ કહ્યું એટલે અમે આવ્યા’. પાંચ મિનિટમાં

એમ્બ્યુલન્સ આવી જશે.

હજુ તો વાત ચાલતી હતી ત્યાં દરવાજે ,પેરામિડિક્સ આવીને ઉભા હતા. અંદર

આવીને, રોમાને તપાસી ઇમરજન્સીમાં લઈ જવા રવાના થઈ. રોહિત પણ સિધો

તેની પાછળ જવા નિકળ્યો. માને ઘર સાચવવાનું કહી એમ્બ્યુલન્સની પાછળ ગયો.

ત્રણેક કલાકની ડોકટરોની મહેનત પછી રોમા ભાનમાં આવી. રોહિતને જોઈને

બોલી, ‘હું ક્યાં છું’? રોહિતે તેને શાંત રહેવાનૉ ઇશારો કર્યો. રોમા સમજીને ચૂપ રહી.

ડોક્ટરે એક દિવસ હોસ્પિટલમાં ચેક અપ કરવા રાખી. બીજે દિવસે ઘરે જતાં રસ્તામાં

રોમા બોલી, ‘શું થયું હતું મને’ ?

મને ખબર નથી, પણ હું બેદિવસ પહેલાં ઘરે આવ્યો ત્યારે આપણા ડ્રાઈવ વેમાં પોલિસની

ગાડી ઉભી હતી. તું ઘરમાં બેભાન હતી, એમ્બ્યુલન્સની રાહ જોતા હતા. બસ પછી તું

હોસ્પિટલ આવી, અને અત્યારે આપણે ઘરે જઈ રહ્યા છીએ.

રોમા વિચારી રહી. હાં, બપોરે મમ્મીની સાથે લંચ લેવા બેઠા હતાં. પાણી ભૂલી ગઈ હતી

તેથી લેવા ઉઠી, લઈને આવતા પગ લપસ્યો. ગ્લાસમાંથી પાણી ઢોળાયું અને ગ્લાસ ફૂટી

ગયા. મમ્મી બધું સાફ કરતા હતાં. અચાનક રોમાને જમીન પર જોઈ ‘૯૧૧’ ને ફોન કર્યો.

ખાસ કાંઇ સમજતાં નહી અને આવડતું પણ નહી.

બસ, ત્યાર પછી તું જાણે છે.

‘રોમા મનમાં ને મનમાં વિચારી રહી. ગામડાના છે, કહી રોહિતને માને જરા પણ ઈજ્જત

આપતી નહી. એને સાસુજીના વિચાર, આચાર અને દીદાર જોઈ શરમ આવતી. સાસુમા

ગામડાના અને રોમા, શહેરની આધુનિક યુવતિને ક્યાંથી આવી અણઘડ સાસુ ગમે ?

રોમાને પાંચ મહિના થયા હતા. સાસુમા બનાવતી એ ચીજો પ્રેમે આરોગતી. વિચાર ન

આવતો કે ખોટા વિચાર કરીશ તો બાળક પર સંસ્કાર કેવા પડશે ! રોહિતની માતા

મુંગા મોઢે કામ કરતી. અવહેલના ગણકારતી નહી. રોહિતે માને અમેરિકા બોલાવી,

એને વિશ્વાસ હતો મા ધીરે ધીરે બદલાશે. એ હમેશા સજાગ રહેતો અને માને સમજાવતો.

એટલે તો આજે ‘મા’એ ૯૧૧ ને ફોન કર્યો. ઈમરજન્સી જેવો શબ્દ બોલી ફોન મૂકી દીધો.

રોમા ની જીંદગી બચવાનું કારણ રોહિતની મા હતી !

માત્ર રોમાની નહી, તેના પેટમાં પોષાઈ રહેલા પારેવડાંની પણ ! રોમાને પોતાના વર્તન

બદલ ખૂબ અફસોસ થયો. કઈ રીતે રોહિતની માની માફી માગે. ગમે તેમ તો તે રોહિતની

મા હતી. એમ સમજીને પણ ઈજ્જત આપવી જોઈતી હતી.

ખેર, રોહિતની માને તો આમાં પોતે કોઈ પરાક્રમ કર્યું હોય એવું લાગ્યું ન હતું. રોહિતથી ન

રહેવાયું. રોમા અને રોહિત માને લઈને મંદીરે દર્શન કરવા ગયા. રોમા, રોહિત અને રોન માને

પગે લાગ્યા. રોમા એ માજીનો દિલથી આદર કર્યો. તેનું વર્તન કહી આપતું હતું કે તે ખરેખર

રોહિતની માને ચાહે છે. તેના મુખ પર પોતાનો તથા આવનાર બાળકનો જાન બચ્યાની ખુશી

તરવરી ઉઠી. રોહિતની માએ પ્રેમે રોમાનું કપાળ ચુબ્યું.

રોમાને આખરે ભાન થયું ‘સાસુ-મા’ પણ હોય છે. એ કોઈ જુદા ગ્રહનું પ્રાણી નથી ! જે વ્યક્તિ પતિને

વહાલી હોય તે પત્નીને કેમ ન હોય એ વાત મારે ગળે ઉતરતી નથી. ખેર, બન્ને જણા હેમખેમ છે.

જાણે અનજાણે રોહિતની માએ બે પ્રાણ ઉગાર્યા.





“બસ એક “

18 11 2021

kids

 

‘બસ એક બાળક’, માનવ તને કઈ રીતે સમજાવું. મને મા બનવાની ખૂબ ઈચ્છા છે.

મને તારી એક નાની પતિકૃતિ પ્રાપ્ત થાય’. માન મને આપણા પ્યારની એક નિશાની

માટે શું કામ તરસાવે છે. માનસી માનવને સમજાવીને થાકી. માનવ કોઈ રીતે તેની

વાત માનવા તૈયાર ન હતો. તેણે માનસીને લગ્ન પહેલાં પણ આ બાબતની ચોખવટ

કરી હતી.

માનવના પ્રેમમાં પાગલ માનસીએ સ્વીકાર કરી માનવને પોતાના મનનો માણીગર

બનાવ્યો હતો. હમણાંથી તેની સૂતેલી સંવેદના આળસ મરડીને બેઠી થઈ હતી. ખેર

માનવે માનસીને મનાવી લીધી. માનસી , માનવની સામે માની ગઈ છે તેવો દેખાવ

કરવામાં સફળ ઉતરી.સવાર પડી, માનવ રોજની આદત પ્રમાણે માનસી સાથે ચા

અને ટોસ્ટ ખાઈ જોબ પર જવા રવાના થયો. આજે માનસીને કશું ગમતું ન હતું.

વિચાર કર્યો, નવ વાગે રોશનીને ફોન કરું. સવારના બાળકો અને તેનો પતિ જાય

પછી તે નવરી થાય.

માનસીને ઘરે નેન્સી વર્ષોથી કામ કરતી હતી. અડધી ઈંડિયન થઈ ગઈ હતી. શી

મેઈક્સ ગૂડ મસાલા ટી. માત્ર મસાલા કરવા માનસી કિચનમાં જતી. નવ વાગ્યા.

‘હલો, રોશની’.‘હા, બોલ આજે સવારથી મારી ડાબી આંખ ફરકતી હતી. આ

વખતે વિક એન્ડમાં મળ્યા ન હતા તેથી મને હતું જ કે તારો ફોન આવશે’.‘અરે,

યાર તું આવને . સાથે બેસીને બેક યાર્ડમાં પુલ પાસે ચા અને ટોસ્ટ અથવા તું કહે

તો ગરમ બટાટા પૌંઆ ખાઈએ.’ સ્વિમિંગ સુટ લેતી આવજે મન થાય તો સ્વિમિંગ

કરી વેટ સોનામાં બેસીશું.  આવી સુંદર સોમવારની સવાર ઉગે તો કોણ ના પાડે ?

‘તુમ બુલાએ ઔર હમ ન આએ’.ઓ.કે.‘સાંભળ મસ્ત ગરમ બટાટા પૌંઆ અને

કિટલી ભરીને ચા. તૈયાર કરાવ હું કપડાં બદલીને આવું છું . સ્વિમિંગ માટે ‘રેઈન

ચેક” લઈશ મારે  આજે બહાર જવું છે’.હજુ તો બધું  ટ્રેમાં ગોઠવીને નેન્સી પુલ

પાસે લાવી રહી હતી ત્યાં ડ્રાઈવ વેમાં રોશનીની ગાડીનો હોર્ન સંભળાયો. તેને

આદત હતી, આવે એટલે હોર્ન વગાડે.

‘શું યાર પાછું તારા દિમાગ પર બાળકનું ભૂત સવાર થયું લાગે છે’.‘હા, એ જ

કારણ છે’.‘તને કેવી રીતે સમજાવું’?‘ચાંપલી, મને સમજાવવા કરતાં માનવને

કેવી રીતે યુક્તિ પૂર્વક સંકજામાં લઈએ કે એ બાળક માટે રાજી થાય.’‘તારો

માનવ બાળપણમાં જે ભોગવી ચૂક્યો છે તે વિસારે પાડતો નથી. તને કેટલો

પ્રેમ કરે છે. શામાટે તું ખુશ રહેતી નથી’.

માનવ કોઈ પણ હિસાબે બચપન વિસરી શક્તો નહી. તું તો જાણે છે, એ

કેટલો જીદ્દી છે.‘મને એટલે જ તો અમારા પ્રેમની નિશાનીઓની ઉત્સુક્તા

છે.  હું એટલું સુંદર બાળપણ મારા બાળકને આપવા માંગુ છું કે માનવ તેને

ફરીથી જીવી આનંદ માણે. તું સ્ત્રી છે એટલે મારી લાગણી સમજી શકે’.

‘ચાલ આજે આપણે બન્ને ભેગા થઈ કંઈક ઉપાય શોધીએ’.રોશનીને

અચાનક યાદ આવ્યું. ‘માનસી તું બે મહિના પહેલાં તારી નાની બહેન

મહેકના જોડિયા બાળકને રમાડવા શિકાગો ગઈ હતી. તેને થોડા દિવસ

તારે ત્યાં બોલાવ. જોજે એ બાળકોને જોઈ કદાચ તેનું મન પલળે’. મહેકના

દીકરો અને દીકરી ખૂબ સુંદર હતાં. બે બાળકો સાથે હતા એટલે તેને તકલિફ

પડતી હતી.

નેની હતી છતાં પણ તે ખૂબ થાકી જતી. મહેકનો પતિ પોતાના કામકાજમાં

ખૂબ વ્યસ્ત હતો.રોશનીએ કહી એ વાત માનસીને ખૂબ ગમી ગઈ. મહેક

આવશે બાળકોને લઈને ઘર ચહલ પહલથી ઉભરાઈ જશે. જોઈએ કદાચ

માનવને અસર થાય. બાળકો તેમનું જાદુ માસા પર ચલાવે.‘અરે, યાર

‘વોટ અ ગ્રેટ આઈડિઆ’. આમ પણ સાળી એટલે અડધી ઘરવાળી.

માનવને તેની સાળી વહાલી હતી. માનસીનો ભાઈ મુંબઈમાં હતો.

દીદીએ ફોન કરીને થોડા દિવસ પોતાને ત્યાં આવવાનું આમંત્રણ આપ્યું.  

મહેક શિકાગોમાં ઠંડી બહુ છે. બન્ને બાળકોને લઈને અંહી હ્યુસ્ટન આવ.

શિકાગોની ઠંડીથી બચવા નાના બે બાળકોને  અને તેમની નેનીને લઈ

મહેક આવી પહોંચી.  મહેકને સમજાવી રાખી હતી.

     પ્લાન પ્રમાણે તેની બહેન આવી. માનસી ઘરમાં  બે ક્રીબ લઈ આવી,

બે પ્લે પેન લઈ આવી. તેનું દિલ તેમજ ઘર વિશાળ હતાં. ઘર બાળકોના

કિલબિલાટથી ઉભરાઈ ગયું. માનવ નાના બાળકને આવીને રમાડતો અને

પછી પોતાના રૂમમાં જતો રહેતો. તેને ઘણીવાર અવાજ ગમતો નહી.

મહેક થોડા દિવસની મહેમાન હતી એટલે કાંઈ ન બોલવાનું ઉચિત માન્યું.

ઘરમાં આવેલા મનગમતા મહેમાન થોડી તકલિફ આપે તો પણ પ્યારા લાગે.

આજે રવીવાર હતો. છેલ્લા બે દિવસથી મિટિંગમાં ખૂબ બિઝી હોવાને કારણે

આજે માનવને આરામ કરવો હતો. રાતે ડીનર પર જવાનો પ્લાન હતો.  મહેક

અને માનસી મેસીઝમાં શોપિંગ કરવા ગયા હતાં. નેની હતી પણ અચાનક,

એક સાથે બન્ને બાળકો રડવા લાગ્યા. નેની બેઉને સાચવવા અશક્તિમાન

હતી.હવે નાનું બાળક કહીને તો ન રડે!

ઘરે હોય એટલે  કામ માનવને છોડે નહી. ઓફિસનું કામ કરતો માનવ ત્યાં

આવી પહોંચ્યો. નેનીએ રિકવેસ્ટ કરી, ‘ કેન યુ હોલ્ડ વન ચાઈલ્ડ, આઈ

વિલ ગો એન્ડ બ્રિંગ સમ મિલ્ક ફોર બોથ ઓફ ધેમ’.

માનવની હાલત કફોડી થઈ, પણ ના ન પાડી શક્યો. તેના હાથમાં બેબી

બોય હતો. નેની બેબી ગર્લને લઈને કિચનમાં  ગઈ. દિવસ દરમ્યાન કોટનનું

ડાઈપર પહેરાવ્યું હતું. અચાનક  માનવના હાથમાં સોંપેલા બાળકે પીપી કરી.

માનવનું પેન્ટ ભીનું થયું.  તેનો ગુસ્સો ગયો. કોને ખબર કેમ, તેનું વિચિત્ર મોઢું

જોઈ હાથમાંનું બાળક કિલકિલાટ કરતું હસવા લાગ્યું. માનવે આંખો કાઢી.

તેમ તે જોરથી હસી રહ્યું. માનવનો ગુસ્સો ઉતરી ગયો. તે પણ બાળક સાથે

હાસ્યમાં જોડાયો. માનવનું હસવું માતું ન હતું. બાળકે પી કરી તેનું પાટલુન

ભીનું કર્યું હતું.

નેની ગભરાઈને કિચનમાંથી આવી. તે પણ આ દ્રૂશ્ય જોઈને આભી થઈ ગઈ.

તેને ખબર હતી, માનવને નાના બાળકો ગમતા નથી.

‘આર યુ ઓ.ક. મિસ્ટર શાહ’ ? કહીને ગભરાતાં ગભરાતાં બોલી. તેના હાથની

બાળકી શાંત થઈ ગઈ હતી.

‘યસ આઈ એમ ફાઈન’.

નેની એ નાની બાળકીને ક્રીબમાં મૂકી દૂધની બોટલ આપી.

‘લેટ મી હેવ હિમ ,આઈ વિલ ચેન્જ ધ ડાઈપર’.

માનવે પહેલી વાર બાળકને ગાલે ચૂમી આપી અને નેનીને  બાળક આપ્યું.

‘ચેન્જ હિમ અન્ડ ગિવ મી બેક, આઈ વિલ ફીડ હિમ.’ નેની તો આ વાક્ય સાંભળીને

સડક થઈ ગઈ.

નેની તેનું ડાઈપર બદલવા લઈ ગઈ. સાફ કરીને મિલ્કની બોટલ તેને પણ આપી.

માનવ પ્રેમથી તેને દૂધ પિવડાવી રહ્યો. જ્યારે તે સૂઈ ગયો ત્યારે માનવે ફોન કરી

માનસી અને મહેકને ઘરે તરત આવી જવા જણાવ્યું. માનસી ખૂબ ગભરાયેલી હતી.

મહેકને કહે, ‘નક્કી નેનીએ કાંઈક લોચો માર્યો હશે. માનવને ગુસ્સો આવ્યો હશે તો

તેને ઠંડો પાડતાં મને વાર લાગશે. મહેક, તું ઘરે જઈને બાળકો પાસે રૂમમાં જતી રહેજે,

હું એને સાચવી લઈશ. ‘

મહેકને ખબર હતી જીજુને બાળકો ગમતા નથી.

બન્ને ઘરે આવ્યા. ઘરમાં આવતાની સાથે, ‘મહેક આ જો તારા પ્રિન્સના પરાક્રમ, રડતો

હતો, નેનીએ મને સાચવવા આપ્યો.’

માનસી અધિરાઈથી બોલી,’તને બહુ તકલિફ આપી, સોરી માન’.

માનવના હાથમાં બેબી બોય  જોઈ આભી થઈ ગઈ.

માનસી માનવને માન કહેતી.

‘અરે માનુ, આખી વાત તો સાંભળ એ નટખટે મારું પેન્ટ ભીનું કર્યું. કહી માનસીનો

હાથ પકડી તેને ભીનાનો અનુભવ કરાવ્યો.

માનસી ખૂબ ડરી ગઈ, ‘માન, કાલે તારું પેન્ટ ડ્રાયક્લિનિંગમાં હું આપી આવીશ’.

‘માનસી, ખબરદાર છે એ પેન્ટ ધોવડાવ્યું છે તો. એણે તો મારામાં સ્પંદનો જગાવ્યા.

બસ હવે .  “તું અને હું. હું અને તું.”

માનસી માનવમાં આવેલા પરિવર્તનના ઓળા ઓળખી ગઈ.





તપાસી લેજો !

14 11 2021
give

“તપાસી લેજો બરાબર”! છેલ્લા શબ્દો કાનમાં ગુંજે છે. પીછો છોડતા નથી !

આખી જીંદગી વરના પૈસા જલસા કરવાની આદત પડી ગઈ હતી. નસીબ સારા

હતા કે પૈસાની તંગી ક્યારે પણ અનુભવી ન હતી. પાંચ માગે તો વર પચાસ આપે

તેવો હતો. રાહ જોઈ રહી હતી ક્યારે માનવ ઘરે આવે અને તેની વાત કરે. જાણે

વાઘ ન માર્યો હોય એટલો ઉલ્લાસ તેના મુખ પર જણાતો હતો .

માનસી, માનવની રાહ જોઈ રહી હતી. આજનું કરેલું પરાક્રમ માનવને જણાવવા

આતુર હતી. માનવ સાંજે ઘરે આવે એટલે બન્ને સાથે બેસી ચા નાસ્તો કરે. જમવાની

ઉતાવળ ન હોય. હજુ તો માનવે ચા પીધી ત્યાં માનસી ઓલી ઉઠી, ‘માનવ મેં આજે

પાંચ હજાર રૂપિયા બચાવ્યા.’

‘કેવી રીતે’.

અરે,’ હું પેલી ૨૫ હજારની સાડી લાવી હતી એના પર ડાઘ પડી ગયો. ગઈ કાલે જ

ખરીદી હતી એટલે દુકાન વાળાને કહ્યું તો પાંચ હજાર ઓછા કરી નાખ્યા. ‘

માનસી ડાઘ તારાથી પડ્યો હતો ?

માનસીએ જવાબ ન આપ્યો. માનવ સમજી ગયો પણ બોલ્યો કંઈ નહી.

આ તો પાંચ હજાર રૂપિયાની વાત હતી પણ શાકવાળા, ફળવાળા બધા સાથે કચકચ

કરે. જરા પણ સમજવાની તકલીફ ન લે કે દસ યા પંદર રૂપિયામાં એવો કયો મહેલ બની

જવાનો હતો. માનસી પાસે ઓછું ન હતું.

એ માનતી કે કસીને લેવાથી પોતાની જાતને ખૂબ ચાલાક સમજતી. કોઈનો બે પૈસા

કમાવાનો હક મારે છે એવું તો એની જાડી બુદ્ધિ ક્યારે પણ સમજતી નહી.

ગરીબ માણસ મને કે કમને એને રાજી રાખતા. બોલે પણ શું.નફો થોડો ઓછો થતો. પણ

ઘરાક, કાયમનું હતું. માનવને આ જરા પણ ન ગમતું. માનસી ,’તને સમજ ન પડે. કહી

ચૂપ કરી દેતી.

માનવ હોંશિયાર હતો. જ્યારે એકલો ખરીદી કરવા જાય ત્યારે રૂપિયા વધારે આપી

આવતો. એક વખત માનસીનું પાકીટ ફળવાળા ના ટોપલામાં પડી ગયું. પૈસા આપ્યા

પછી, કેવી રીતે તેનો ખ્યાલ ન રહ્યો. રાતના ઘરે જતી વખતે ફળવાળા એ ટોપલામાં કોઈનું

પાકીટ જોયું. ખોલ્યું તો અંદર દસ થી પંદર હજાર રૂપિયા હતા. એમાં માનસીના ફોટાવાળું

એક કાર્ડ પણ હતું. એ સમજી ગયો પાકીટ કોનું છે.

એક મિનિટ એને વિચાર આવ્યો, ‘આટલા બધા પૈસા, મેમસાહેબ કેવી રીતે જાણશો કે

પાકીટ મારા ટોપલામાં પડ્યું છે ?.

એણે તો કશું બોલવું જ નહી એમ નક્કી કર્યું. આખી રાત લાંબી તાણીને સૂઈ ગયો. બીજા

દિવસે સવારે ધંધે જવા નીકળતો હતો ત્યાં તેની ઘરવાળી બોલે, ‘આ કાલે મળ્યું હતું એ

પાકીટ મેમસાહેબ ને આપી દેજો’. ફળવાળો બોલ્યો,’ એ રોજ મને ઓછા પૈસા આપે છે. .

શામાટે પાછું આપું ?

ઘરવાળી બોલી, ‘હાય, હાય એવો હરામનો પૈસો મને ન ખપે’. આપણે મહેનતનું કમાઈએ

છીએ. તમારી દાનત કેમ બગડી’ ?

ફળવાળા ની આંખો ‘હરામનો પૈસો’ સાંભળી ખુલી. વિચાર બદલ્યો. એ બહેન જેમનું નામ

માનસી હતી એના આવવાની રાહ જોવા લાગ્યો.

માનસી આવી અને ફળ ખરીદ્યા. હંમેશની જેમ ભાવ તાલ કર્યો. જેવા પૈસા આપ્યા કે

ફળવાળો બોલ્યો, ‘બહેન કાલે તમારું કાંઈ ખોવાયું હતું’?

માનસી ચમકી, આને કેવી રીતે ખબર પડી. ?

એણે માથું હલાવીને હા પાડી.

ફળવાળા એ ખિસ્સામાંથી પાકીટ કાઢો અને સામે ધર્યું.

માનસીએ, એના હાથ માંથી પાકીટ ઝૂંટવી લીધું.

‘ બહેન બધા પૈસા અને વસ્તુ બરાબર તપાસી લેજો ‘ !





મારો દેશ

12 11 2021
javan

આવો આજે કહું એક સુંદર વાત

આ છે મારા દેશની અનોખી વાણી

*

ખેતી પ્રધાન છે મારો દેશ

૨૧મી સદીમાં ટેકનિલોજીનો સંદેશ

નવા અને જૂનાનું સુભગ મિલન

આ છે મારા દેશની અનોખી વાણી

**

તમારી કલાને આવડત ઓપે

કર્મના સિધ્ધાંતને નખશિખ નિરખે

વડાપ્રધાન જેમને પદ્મશ્રીનો ખિતાબ આપે

આ છે મારા દેશની અનોખી વાણી

*

પરિવર્તનશિલ આ સંસારે નિત નવું

ખિતાબ પામવા ન સ્વપ્ન જોયું

બસ કર્મ કર અને ફળની આશા ન રાખ

ગીતાને રગરગમાં વર્તન દ્વારા ઉતારી

આ છે મારા દેશની અનોખી વાણી

**

ન માગ્યું દોડતું આવે એ માનજો

માગ્યા વગર તો મા પણ ન પિરસે

સુણો આ છે મારા દેશની કહાની

તારી નિષ્ઠા, તારી ભાવના ઝળકવાની

આ છે મારા દેશની અનોખી વાણી

**

શ્રદ્ધા, વિશ્વાસને સહારે ચાલે વહાણ

દેશનું સુકાન છે યોગ્ય વ્યક્તિને હાથ

સાથ અને સહકાર તું જરૂર આપ

જો જે પરિણામ આવશે યાદ રાખ

આ છે મારા દેશની અનોખી વાણી





મનની વાત

8 11 2021
rain

શું સુંદર ઓફિસનો દિવસ હતો. ઝરણાને એક મોટા પ્રોજેક્ટ્ની જવાબદારી સોંપાઈ હતી.

આ જવાબદારી પૂરી કરવા છેલ્લા પંદર દિવસથી ઝરણા મચી પડી હતી. ઘરનું કામકાજ

પણ સંભાળી શક્તી નહી.

નાની રિયા ચોથા ધોરણમાં હતી. શાળાએથી આવે એટલે સાસુ માલતી તેને સાચવી લેતી.

એક જમાનામાં માલતી પણ શાળામાં શિક્ષિકાથી આચાર્ય પદ સુધી પહોંચી હતી. નોકરી

પરના તનાવ ભર્યા વાતાવરણથી પરિચિત હતી.

જતીન પાસે તો ક્યારે સમય હોય જ નહી. એને ખબર હતી મા બધું સંભાળશે. મા પર તેને

ગળા સુધી વિશ્વાસ હતો. નાનો હતો ત્યારે મા એ જે લાડથી ઉછેર્યો હતો તે બરાબર યાદ

હતું. મા અને ઝરણાની વાતમાં ક્યારેય વચ્ચે ન બોલતો. જેને કારણે ઝરણાએ ‘સાસુમાનો’

પ્રેમ સંપાદન કર્યો હતો.

ઝરણાના લગ્નને બાર વર્ષ થઈ ગયા હતા. ગયા વર્ષે પિતાને ગુમાવ્યા એ સદમામાંથી બહાર

નિકળવાનું આસાન ન હતું. સહુએ સાથે પ્રયત્ન કર્યા. માલતી સદમાને કારણે લગભગ મૌન

થઈ ગઈ હતી. ઝરણા સમજતી અને ખૂબ પ્રેમાળ વર્તન કરતી.

ઝરણાની નોકરી જવાબદારીવાળી હતી. પગાર પણ જોરદાર મળતો હતો. ૨૧મી સદીમાં

સ્ત્રી ખરેખર પુરૂષ જેટલા પૈસા બનાવે છે. માલતીને ખોટ સાલે એ સ્વભાવિક હતું. પણ

ઝરણાની નોકરીની જવાબદારી અને રીયાનું શાળાનું કામ. જતીન બોલતો નહી. માને પાછી

કામે વળગેલી જોઈ હાશ અનુભવી. ઝરણાને પણ ઘરે આવે પછી રીયાનું ખાસ કામ રહેતું નહી.

રાતના નવડાવવાની જવાબદારી ઝરણાની. તૈયાર થાય એટલે સૂવા મૂકવાની જવાબદારી પિતા

જતીનની. એમાં જરાપણ ફરક ન પડ્યો.

બે અઠવાડિયા પૂરા થયા, સાંજે ઝરણા ઘરે આવી. માથા પરથી બોજો હટી ગયો હતો. ઓફિસમાં

એના પ્રોજેક્ટની ખૂબ ચર્ચા થઈ. ઝરણાની પ્રસંશાના પડઘા ચારે બાજુ સંભળાઈ રહ્યા હતા. જતીને

સવારે ઝરણાને ખાસ યાદ કરાવ્યું હતું, ” આજે સાંજના ઓફિસે તને લેવા આવીશ. તું સવારે ટેક્સી

કરીને પહોંચી જજે”. ઝરણાને ખૂબ ગમ્યું હતું. જતિન ઝરણાને બરાબર જાણતો હતો. તેની કાબેલિયત

પર ગળા સુધી વિશ્વાસ હતો.

માલતીને ઝરણા વહાલી હતી. તેની પસંદ નાપસંદનો આછો પાતળો અંદાઝ તેને પણ હતો. ઝરણા જ્યારે

ખૂબ સુંદર નશામાં હોય ત્યારે તેને ભેળ ખાવાનું મન થતું. માલતીએ આજે ભેળ અને પાણીપુરીનો બંદોબસ્ત

કર્યો હતો. નાનકી રિયા પણ પાણીપુરી ચાર હાથે ખાતી.

ઝરણા અને જતીન ઘરે આવ્યા. નાનકડી રિયા બારણા પાસે આવી ગઈ. તેનો હાથ દરવાજો ખોલવા પહોંચ્યો.

દાદી આવી, દરવાજો ખુલ્લો હતો. ‘મમ્મી આજે દાદીએ ભેળ અને પાણીપુરી બનાવ્યા છે’. રિયા ખુશીથી નાચી

રહી હતી. ઝરણા માની ન શકી કે , મમ્મીને મારા મનની વાત કેવી રીતે ખબર પડી ?





ભાઈ બીજ

6 11 2021

ભાઈ બીજ એ ખૂબ પ્રિય તહેવાર છે. બે મોટા ભાઇ છે.

હવે તો તેમની તબિયત નબળી થઈ ગઈ છે. કિંતુ નાની

હતી ત્યારે જે આનંદ માણ્યો હતો એ આજે રહી રહીને

યાદ આવે છે.

બાળપણમાં લટાર મારવી ગમે છે. હા, એ દિવસો પાછા

નથી આવવાના ખબર છે.આજની તારિખમાં વળી એ

દિવસનું મહત્વ અનેક ગણું વધી ગયું છે. કારણ વ્યાજબી

છે.

બીજા નંબરનો પૌત્ર ૧૯૯૭માં ૨જી નવેમ્બરે ભાઈ બીજને

દિવસે આ ધરતી પર આવ્યો હતો. આજે ૨૪ વર્ષનો થયો.

એક સાથે બે કારણ છે.

મનના ભાવ લખીને વહાવી દેવાનું મન નથી. બસ જાત

સાથે વાત કરી તેને સમજાવવું ગમે છે. આનંદ વ્યક્ત

કરવો તેના કરતાં અહેસાસ વધારે પ્યારો લાગે છે.





Diwali 2021

3 11 2021

May be an image of fire and text

આજે સલોની ખૂબ ખુશ હતી. લગ્ન પછીની પહેલી દિવાળી સાસરે પતિ તેમજ સહકુટુંબ ઉજવવાની હતી. હૈયામાં ઉમંગ માતો ન હતો. તેને બરાબર યાદ હતું, મમ્મી દર વર્ષે કેવી રીતે ઉત્સાહ પૂર્વક દિવાળી ઉજવતી હતી. સલોનીનો ઉત્સાહ જોઈને સાહિલે ધીરેથી તેને સમજાવ્યું.

પરણીને સાસરે જતી કોડિલી કહ્યા કેટલા સ્વપના જીવનમાં સાકાર કરવા ઉત્સુક હોય છે. એમાં મનનો માન્યો જ્યારે પતિ રૂપે પામે ત્યારે તેની મઝા કોઈ ઔર હોય છે. બસ આવાજ કાંઈ હાલ સલોનીના હતા. પતિને ત્યાં પ્રેમ આપી પ્રેમ પામવા તે ઉત્સુક હતી. દિવાળીના પવિત્ર અને ખૂબ સુંદર પર્વની ઉજવણી માટે તેણે કેટલા કિલ્લા બાંધ્યા હતા? કેટલી ઈમારતો ચણી હતી ? આજે તે સઘળું પતિ તેમજ ઘરની સર્વ વ્યક્તિઓને  જણાવવા તલપાપડ થઈ રહી હતી !

‘ સલોની, જરા શાંત થા. મમ્મીને (સાસુમાને) કેવી રીતે ઉજવવી છે તે જાણવાનો પ્રયત્ન કર. આજે તું ઘરમાં છે. મમ્મી ખુબ ખુશ છે. તેનો અભિપ્રાય જરૂરી છે. તને પૂછે એટલે તારા વિચાર નિખાલસ પૂર્વક જણાવજે’.

સલોની સમજી ગઈ. સાહિલની કહેવાની ઢબ પર વારી ગઈ. તેને થયું , મમ્મીજી મને ખૂબ વહાલ કરે છે. મને ગમતું કરવામાં જરાય વાંધો નહી આવે. સલોનીની વાત સાચી પડી.

”સલુ બેટા, આ વર્ષે તમારી પહેલી દિવાળી છે. તમારા કોઈ વિચાર હોય તો જણાવો “.

સલોની માની ન શકી. સાહિલ તેની મમ્મીને બરાબર ઓળખતો હતો. સલોની પણ કમ ન હતી. તેને અચાનક યાદ આવી ગયું  જ્યારે એણે સહુ પ્રથમ કમપ્યુટરનો કલાસ કર્યો હતો, ત્યારે શિખવનારે બે વાત ખાસ કહી હતી. આ વાત સલોની ૧૪ વર્ષની હતી ,ત્યારની છે.  પહેલું ‘કમપ્યુટર બુદ્ધુ છે. બીજું, સામેવાળી વ્યક્તિને માન આપો તમને બમણું મળશે’. ક્યાંથી આ વાત યાદ આવી ગઈ. તે સાહિલના મમ્મીજીને ઓળખતી હતી સાથે રહેવાથી થોડી પરિચિત પણ થઈ. તેમને દીકરી હતી નહિ. પોતે ઘરમાં પ્રથમ વહુ હતી જે દીકરીનું સ્થાન પામી હતી. સૌમિલ હજુ નાનો હતો . આ વર્ષે કોલેજમાં આવ્યો હતો. તેની પાસે પુરતો સમય હતો સાહોલના મમ્મીની નજદીક સરવાનો.

સલોની ,પ્રેમથી બોલી. ‘મમ્મીજી મને આપણા ઘરની રીત બતાવો પછી હું મારો અભિપ્રાય આપું. ‘

સલોનીની મીઠી વાણીએ મમ્મીજીનું દિલ જીતવાનું કામ, કર્યું. તેમણે આટલા વર્ષોથી ચાલી આવતી પ્રથા સમજાવી.

‘મમ્મીજી આ તો ખૂબ સુંદર પ્રથા છે. હવે તમે મને પૂછ્યું તું, હું મારો વિચાર જણાવું. એમ વિચારી પોતાનું વિચાર રજૂ કર્યો. મમ્મીજી ખૂબ ખુશ થયા. રાતના જમવાના ટેબલ ઉપર પ્રસ્તાવ મૂક્યો,’ આ વર્ષે દિવાળીના દિવસોમાં સલોની થોડો ફેરફાર ઈચ્છે છે. મને તેનો વિચાર ખૂબ ગમ્યો છે. પપ્પાજી ખુશ થયા. સાહિલને તો રાતના બારણા બંધ થાય ત્યાં સુધી રાહ જોવાની હતી.  તેની ધીરજ રહી નહી. તેણે આંખોના ઈશારાથી પોતાની ખુશી દર્શાવી.

દિવાળી આવે એટલે ઘર સાફ કરવાનું , સારું ખાવાનું બનાવવાનું, ફટાકડા ફોડવાના અને નવા કપડાં પહેરી તહેવાર ઉજવવાનો. સલોનીએ દિવાળીનું મહત્વ સમજાવ્યું. એ આપણા ભરતનો ખૂબ પવિત્ર અને વૈભવશાળી તહેવાર છે. અસત્ય ઉપર સત્યનો વિજય છે. નવું વિક્રમ સંવત વર્ષનો શુભારંભ થાય છે.  રાજા રામની કહાની અને મહાવીર સ્વામીના નિર્વાણની વાતથી સહુ માહિતગાર છે.

સલોનીએ નવું કંઇક કરવાનો પ્રસ્તાવ મૂક્યો. ૨૧મી સદીમાં આપણા દેશની પ્રજા જ્યારે પ્રગતિને માર્ગે આગેકૂચ કરી રહી છે તે સમયમાં સાથ આપવાનો સંકલ્પ કર્યો. ઘરમાં કામ કરતાં દરેક વ્યક્તિના પરિવારની પ્રગતિ માટે કાળજી કરવાનો પ્રસ્તાવ મૂક્યો. જેને કારણે તેઓ સહુ વફાદારી પૂર્વક પોતાનું કાર્ય નિભાવવા તત્પર રહે.

ઘરમાં કામ કરનાર સૌને બોલાવી તેમને અંગત પ્રશ્નો પૂછી માહિતી એકઠી કરી.  તેમના બાળકો માટે નવા કપડાં ખરીદ્યા. મિઠાઈના પડીકા બનાવ્યા. સૂકોમેવો જે તેમને સુંઘવા પણ મળતો નહી તેના પડીકા જુદા બનાવડાવ્યા.

મમ્મીજી તો સલોનીનો ઉત્સાહ જોઈ રહ્યા. તેમને થયું , આ છોકરીના હાથની મહેંદીનો રંગ હજુ નિકળ્યો નથી ત્યાં કેટલાળ ઉમંગ અને ઉત્સાહ પૂર્વક આ બધું સંભાળી રહી છે.  તેમને સહિલની પસંદગી પર ગર્વ થયો.

મમ્મીજી અને પપ્પાજી બન્ને એક જ ગામના વતની હોવાને કારણે ત્યાંની શાળાના આધુનિકરણનો વિચાર રજૂ કર્યો. સાહિલના મમ્મી અને પપ્પા ખૂબ ખુશ થયા. દિવાળી દરમ્યાન ખોટા ખર્ચા કરવાને બદલે જરૂરિયતમંદોને પ્રગતિના પથ પર પ્રયાણ કરાવવાનું વધારે ઉચિત લાગ્યું.

સાહિલ અને સલોની બન્ને સાથે ભણતાં હતા. તેમની નોકરી દ્વારા ખૂબ સુંદર આવક હતી. તેઓ માહિતગાર હતાં કે ‘વિદ્યા’નું જીવનમાં શું સ્થાન છે !

મમ્મીજી તો સલોનીના વિચારથી ખૂબ ખુશ થયા. હમણાંજ ઘરમાં લગ્નનો પ્રસંગ ઉજવાયો હતો. ન તો કોઈને નવા કપડાંની જરૂર હતી ન કોઈ આભૂષણની . ફટાકડા પોતાના ઘરમાં કામ કરતી વ્યક્તિઓના બાળકોને બોલાવી ફોડાવ્યા. તેમના મુખ પરનો અનેરો આનંદ જોઈ આખું ઘર ખુશખુશાલ થઈ ગયું. સહુને સુંદર ભોજન કરાવ્યું. ઘરમાં ક્યાં કશાની કમી હતી. આ બધા કુટુંબોના મુખ પર ફરી વળેલી સુરખી જોઈ સહુ આનંદના સાગરમાં હિલોળાં લેવા લાગ્યા.

આવી દિવાળીનો આનંદ ક્યારેય ભાગ્યમાં જોવા પામ્યા ન હતા. સલોનીએ આજ ધારો, સમજણિ થઈ ત્યારથી પોતાની મમ્મીને ત્યાં ચાલુ કર્યો હતો. જે મમ્માજીને પણ પસંદ આવ્યો એ જાણી રાજી થઈ. દિવાળીના દિવસોમાં દિવડાની કલાત્મક ગોઠવણી અને રંગોળીની રજૂઆત સાહિલ પણ ફિદા થઈ ગયો.

ભારતમાં મોટાભાગના બધા ધર્મમાં દિવાળીનું  મહત્વ અલગ અલગ રીતે રજૂ કરવામાં આવ્યું છે. પાંડવો પણ બાર વર્ષનો વનવાસ ભોગવી હસ્તિનાપુર પાછા આ દિવસો દરમ્યાન આવ્યા હતા. રાજ રામ લંકા પર વિજય પ્રાપ્ત કરી અયોધ્યા આવી પહોંચ્યા હતા.

આમ દિવાળીના દિવસો દરમ્યાન સાહિલ અને સલોની, મમ્મી, પપ્પા અને નાના ભાઈ સાથે  આનંદ મંગલ મનાવ્યો.

“સાહિલ તને નથી લાગતું આ રીતે દિવાળી ઉજવવાની મઝા કંઇ ઔર છે” ?

‘તારે જાણવું છે, સહુથી વધારે મઝા કેવી રીતે આવે”?

સલોની સાહિલની બદદાનત પારખી ગઈ !

‘ભાભી’, પેલો નાનો સૌમિલ બોલી ઉઠ્યો, ‘તમે એમ નહી માનતા કે હું તમને આસાનીથી છટકવા દઈશ’ ?

‘કેમ ભાઈ, તમારો શું ઈરાદો છે”?

‘ભાભી દર દિવાળીએ સાહિલભાઈ મને સિનેમા બતાવે, મંદિરે દર્શન કરવા લઈ જાય અને પછી મારી મનગમતી હોટલમાં જમાડે’.

આ અમારા બન્ને ભાઈનો નક્કી પ્રોગ્રામ હોય છે. મમ્મી અને પપ્પા ત્યારે પોતાની સાંજ શાંતિથી ગુજારે. દિવડાઓની દીપમાલા જોઈને  રાજી થાય. કારણ બીજે દિવસે આખું ઘર કાકા, મામા, માસી, ફોઈ,બા દાદા અને નાના નાનીથી ઉભરાઈ જતું હોય.

‘આ તો મમ્મીજીએ મને જણાવ્યું ન હતું. તો તમે બન્ને ભાઈ તમારી રીતે દિવાળી ઉજવો’ !

‘અરે, મારી વહાલી ભાભી આ વર્ષે અમે બે નહી આપણે ત્રણ જણા સાથે ઉજવીશું’.

આમ પ્યાર પૂર્વક વિચારોની આપ લે કરી. સહુના મન જીત્યા. દિવાળી હોય અને સુંદર ખાવાનું, સહુને ખુશી વેચવાની અને નવા વર્ષના વધામણાની તૈયારીમાં મચી પડ્યા. તમને પણ આમંત્રણ છે. જરૂરથી પધારશો, અમારા ઘરનું આંગંણું  પાવન થશે.

****************************************************

******************************************************





તારા વિના —-આજ

31 10 2021

dirty

૩૧મી ઓક્ટોબર.

**

મારા પ્રાણથી પ્યારા પતિનો જન્મ દિવસ.

**

ગેરહાજરીમાં સતત હાજરી જણાય.

**

સમયની સાકળ ક્યારેય એ કડી નબળી પડવા દેતી  નથી .

**

તું નથી તો પણ હું છું

સત્ય છે કે આભાસ

*

તારી ગેરહાજરીમાં પણ હાજરી છે

સત્ય છે કે આભાસ

*

તું દિલની ધડકનમાં વસે છે

સત્ય છે કે આભાસ

*

તું ક્યાંય નથી છતાં અનુભવું છું

સત્ય છે કે અભાસ

*

વર્ષોનો વિયોગ પળ પળ યોગ

સત્ય છે કે આભાસ

*

દેખાય છે આ આજ એ શું છે ?

સત્ય છે કે આભાસ

*

શ્વાસોમાં સદા સોહાય સુગંધ

સત્ય છે કે આભાસ

*

ખરેખર તું મુજથી દૂર છે ?

સત્ય છે કે આભાસ

*

ચારેકોર પ્રસરેલી યાદોનૉ બારાત

સત્ય છે કે આભાસ





મમ્મી, નામ કે નવલકથા ?

28 10 2021
waiting

આજે તારી ૧૭મી પુણ્ય તિથિ પર સ્નેહ ભરી યાદ.

મમ્મી તારે વિષે શું લખવું ? બસ તારું નામ મુખેથી નિકળેને બધું જ તેમાં

સમાઇ જાય. હ્રદયના ભાવ બહાર ઉછળી પડે. અંતરે પરમ શાંતિનો અહેસાસ

છે. તારી સાથે વિતાવેલાં બાળપણના વર્ષો અને તારી જીંદગીના અંતિમ વર્ષો.

તારો સુહાનો સાથ ખૂબ પ્રેમથી માણ્યો હતો.

સમયનો ગાળૉ ખૂબ લાંબો હતો. આજે તો હવે મધુરી યાદો બનીને રહી ગયો.

મા, બચપનમાં તારી આપેલી કેળવણી અને શિસ્તનો આગ્રહ જીવનમાં અતિ

મહત્વનો ભાગ ભજવી રહ્યો.

તારા વિશે કાંઈ પણ લખવું એટલે હાથના કંગનને જોવા આરસીનો ઉપયોગ !

બસ તું હતી, એટલે આજે તારી દીકરી છે. તારો જ અંશ છું, તારી પ્રતિતી હમેશા

થાય એ સ્વભાવિક છે.

મમ્મી, જીવનમાંથી તું ઓઝલ થઈ, શ્રીજીના શરણે શાંતિ લાધી. આશા છે, તું

શ્રીજીના ધામમાં રહી, સેવાની પ્રવૃત્તિમાં મસ્ત હોઈશ. શ્રીજી કાજે મોગરા અને

ગુલાબની સુંદર ‘માલાજી’ બનાવતી તારી છબી આંખ સામેથી ખસતી નથી.

તારી શીળી છાયાની અનુભૂતિ આજે પણ થાય છે. તારી દીકરીના દંડવત

પ્રણામ અને ભગવદ સ્મરણ . જય જય શ્રી ગોકુલેશ

“મા” શબ્દ ઉચ્ચારતા મોઢું ભરાઈ જાય.

“મા” બોલું એટલે નવલકથા લખાઈ જાય.

“મા” સહુથી ઊંચી તારી સગાઈ

“મા” તું હમેશા સંગે છે.

“મા” યાદ છે ને હું તારો જ અંશ છું.

તારી દીકરીના દંડવત પ્રણામ