આસો માસની શરદ પૂનમ,૨૦૨૦

30 10 2020

આ વર્ષે નસિબજોગે શરદ પૂર્ણિમાને દિવસે જ મારા પ્રાણથી પ્યારા પતિનો જન્મદિવસ છે. શરદ પૂનમ આવે અને મારા પ્રિતમની યાદ ઘોડે ચડીને દોડી આવે.

હજુ તો લગ્ન થયાને છ મહિના થયા હતા. વિલેપાર્લાના સુંદર ઘરમાં પહેલી શરદ પૂનમ મનાવી. મકાનની સ્ત્રીઓ અને દીકરીઓ રુમઝુમ કરતી નીચે ચોકમાં ઉતરી આવી. આખા મકાનમાં હું નવી પરણેલી હતી.

જુવાન છોકરીઓને મસ્તી સુઝી,

આસો માસો શરદ પૂનમની રાત જો ચાંદલિયો ઉગ્યો છે સખી મારા ચોકમાં

આપણા મકાનમાં કિયા ભાઈ છે રસિયા જો ગોરીને શણગારી રમવા મોકલે

પછી તો મારા પતિ દેવનું નામ જોરશોરથી લઈને ગરબા ગાવા લાગ્યા. મારે સરસ તૈયાર થઈને જવાનું ! ત્યાર પછી તો આવી કેટલીય શરદ પૂનમ ત્યાં કરી. આજે તો એ બધી મધુરી યાદો સાથે જીવવાનું છે.

ત્યાં અવાજ સંભળાયો.’ મમ્મી, તમે દૂધ પૌંઆ’ બનાવ્યા ?

વિચારોની દુનિયામાંથી હકિકતની હરિયાળી પર પાછી આવી. પૌંઆ સાફ કરવાના હતા. હાથમાં ચારણો લીધોને પાછું મન મસ્ત બન્યું. જીવનમાં થયેલી નાની નાની ભૂલો તો સુધારી હતી. મોટી ભૂલોનું પ્રયાશ્ચિત બાકી હતું.હજુ પણ કેવી રીતે કરવું તે સમજ નથી પડતી. ખેર, આજે એ વિચારને મનમાંથી હડસેલો મારી દૂર કર્યો.

પૌંઆ સાફ થઈ ગયા. મોટા કાચના વાસણમાં દૂધ ગેલનમાંથી ઠાલવ્યું, પૌંઆ નાખ્યા અને સરસ મજાની સાકર નાખી હલાવી રહી. જેમ જેમ સાકર ઓગળતી ગઈ તેમ તેમ મારા હૈયાની મિઠાશ તેમાં ભળતી ગઈ. બરાબર હલાવીને અંદર થોડો એલચીનો ભુકો નાખ્યો. એલચીની સુગંધ પ્રસરી ગઈ. ઢાંકીને ફ્રિજમાં મૂક્યું.

હજુ તો સાંજ પડવાને વાર હતી. રાતના જમીને લોન પર ખુરશી ગોઠવી સહુ બેઠા. ફ્રિજમાંથી કાચના વાસણ પર ચારણી મૂકી એક ટેબલ પર ચાંદનીને તેમા મિલાવવા આમંત્રણ આપ્યું..શરદ પૂનમની રાતે રેલાતી ચાંદની દુધપૌંઆની મિઠાશમાં ખૂબ વધારો કરે ! દીકરાને તો ખબર હોય પણ નાની વહુ આ ક્રિયા આતુરતાથી જોઈ રહી. મોટો દીકરો, તેના બે બાળકો અને નાનો દીકરો અને નાની નવલી વહુ બધા વાતો એ વળગ્યા.

અચાનક મોટી વહુ કહે આપણે ગરબા ગાઈએ. મને મારા પતિદેવ યાદ આવી ગયા. ‘અરે, તું હજુ તૈયાર નથી થઈ ? બધા તારી રાહ જુએ છે’. હજુ રાસ ગરબા ગમે છે. સહુનું મન રાખવા ઉભી થઈ.

હું વિચારમાંથી જાગી. દુધ પૌંઆ ખાવાનો સમય થયો, બધાને સરસ કચોલામાં ભરીને આપ્યા.

નાની વહુ કહે, ‘મને આ ન ભાવે , મેં આ કોઈ દિવસ ખાધા નથી.’

મારાથી કહ્યા વગર ન રહેવાયું, ‘ચાખી તો જો બેટા, આમાં તારા પતિનો પ્રેમ અને પપ્પાજીના આશિર્વાદ છે”. ન ભાવે તો મારા નાનકાને આપી દે જે એ બન્ને કચોલાં પૂરા કરશે.

હવે નાની વહુથી ન રહેવાયું, તરત ખાવા બેસી ગઈ અને એટલા બધા ભાવ્યા કે બધા દુધપૌંઆ ખતમ

આમે ૨૦૨૦, નું વર્ષ યાદગાર છે. આ પૂનમની રાતે તેમાં ચાંદાની દૂધે નિતરતી ચાંદની ઉમેરી. આજની આ રાત હ્રદયમાં કોતરાઈ ગઈ. જે યાદ હરદમ છે તે લીલીછમ બનીને લહેરાઈ ઉઠી.

કોરોનાનો પ્રતાપ જુઓ ,કુટુંબ સાથે સુંદર સમય ગાળવા મળે છે.


ક્રિયાઓ

Information

One response

31 10 2020
nabhakashdeep

શરદ પૂનમ જેવી જ મનગમતી રસવંતી વાર્તા.

રમેશ પટેલ(આકાશદીપ)

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out /  બદલો )

Google photo

You are commenting using your Google account. Log Out /  બદલો )

Twitter picture

You are commenting using your Twitter account. Log Out /  બદલો )

Facebook photo

You are commenting using your Facebook account. Log Out /  બદલો )

Connecting to %s




%d bloggers like this: