મારો પરિચય

પરિચય અપવો એ ઘણું મુશ્કેલ કાર્ય છે. ઍક વખત આપ્યો હતો કિંતુ કમપ્યુટર વાપરવાની અણઆવડત ને કારણે ભુંસાઈ ગયો. જીવનમા  યુવાની આવે ત્યારે બાળપણ અને ઘડપણ આવે ત્યારે યુવાની ભૂંસાઈ જાય તેમ. ખેર હવે તો સવા વર્ષથી મળીએ છીએ એટલે શું પરિચય  આપું?
૨૧મી સદીની કમાલ જુઓ વગર જોએ,વગર સગાઈએ આપણે ઘરોબો કેળવ્યો છે. બસ તમારો પ્રેમ નિરંતર મળતો રહે. ૩૦ વર્ષનો અમેરિકાનો  વસવાટ છતાંય આપણા મૂળભૂત સંસ્કાર ટકાવી રાખ્યા છે. મુંબઈમાં જન્મ, ફેલોશિપ શાળામા અભ્યાસ  અને વિલ્સન કોલેજની જીંદગીને  ભાથામાં બાંધી વહાલસોયા પતિની સંગે બે બાળકો સાથે અંહી આવી વસવાટ કર્યો.

સંસારની જવાબદારી અને બાળકોની પ્રેમાળ સરભરામા  સાહિત્યતો ક્યાંક ઘરને ખૂણે ભરાઈ બેઠું હતું. જ્યારે કુદરતે અણધાર્યું વાવાઝોડુ સર્જી  અંતરમા ખળભળાટ મચાવ્યો ત્યારે પાછી સાહિત્યને શરણે  આવી શાંતિને વરી. કલમ અને કાગળને સહારે અંતરના ભાવ ઠાલવી જીવનની હોડી હંકારી.બાળકો પ્રભુની દયાથી ખૂબ સુખી છે. કિલકિલાટ કરતું ઘરનું આંગણ  ત્રણ પૌત્ર અને બે પૌત્રીથી ગુંજી રહ્યું છે. દિકરીની જ્ગ્યા બે પ્રેમાળ વહુઓથી પૂરાઈ છે. મને લાગે છે આટલું પૂરતું છે.

હા, બંને વહુવારુઓના  પ્રેમ તથા આગ્રહને માન આપી ૧૯૯૭ મા “સમર્પણ” ભક્તિ અને ભજનના ભાવ ભરી ગીતોની કેસેટ બહાર પાડી હતી. ૨૦૦૪ મા “અંતરનો  અવાજ ”નામની પુસ્તિકા.

ગુજરાતી સાહિત્ય સરિતાનાં સંગે સહિયારા સર્જન દ્વારા ઘણી લઘુ નવલકથા અને નવલકથાઓમાં લખવાની તક મળી અને તેમાની “હરીયાળી ધરતીનાં મનેખ” અને “છૂટછેડા-ઓપન સીક્રેટ” પ્રકાશન ના પંથે છે. યોગ શિક્ષીકા તરીકે કાર્યન્વીત છુ અને લગભગ દરેક લલિતકલામાં રસ ધરાવું છું

પરિચયમા જ્યારે વધુ લખવાનો મોકો મળ્યો ત્યારે જણાવતા સંકોચ અનુભવું છું. પ્રભુની કૃપાથી બેંગ્લોર જઈ “યોગ” વિશે જાણકારી મેળવી. એક વર્ષની તપસ્યા અને દેશમા રહેવાનો મોકો પામી. આ મીઠું સંભારણું પાલવે બાંધી પાછી અમેરિકા આવી પ્રવૃત્તિમય બની.

હવે જીવનમા સમાજનું ઋણ ચૂકવવાનો સમય પાકી ગયો છે. છેલ્લા પંદર વર્ષથી “Voice of Sanatan Hinduism” મા મિત્રો સાથે રેડિયો પ્રોગ્રામ, દર રવીવારે “૯ થી ૧૨” પ્રસ્તુત કરી સેવા આપી રહી છું. શ્રીનાથજીબાવાની અસીમ કૃપાથી જાન્યુઆઅરીની ૨૨મી તારીખે ડૉ. નટવરભાઈ ગાંધીના શુભ હસ્તે પ્રથમ નવલકથા ‘એક ડગ ધરા પર ‘નું વિમોચન થયું. ત્યાર પછી પ્રકાશિત કરી ‘જાગીને જોંઉ તો “, ‘જીગરના પપ્પા’, ‘સંઘર્ષની સોડમાં’, ‘ઉમંગનું લોલક’ હાલમાં ચાલુ છે ‘ઝાકળ બન્યું મોતી’

જય શ્રી કૃષ્ણ