ખરેખર

માનવીનો સાચો મિત્ર કૂતરો છે. વફાદાર મિત્ર કૂતરો છે. હવે ધીમે

ધીમે સમજાવા માંડ્યું છે, તેમાંનું સત્ય. છતાં પણ મને કહેશો ઘરમાં

કૂતરો પાળીશ ? તો મારો જવાબ હંમેશની જેમ ‘ના’ હશે.

કહેવાય છે, ‘જો કોઈ અનાથને પાળીને મોટો કરશો તો વખત

આવે તમને દગો દેશે. કિંતુ કૂતરો પાળશો તો તે ક્યારેય તમને

દગો નહી આપે.’.

કદાચ આજ કારણ હશે ૨૧મી સદીમાં લોકો કૂતરા વધારે પાળે છે.

પેલી નાની ખુશીની વાત કરું . ભગવાને ખૂબ રૂપ આપ્યું હતું.

ભણવામાં પણ હોંશિયાર. કઈ કલામાં તે પારંગત ન હતી એ એક

પ્રશ્ન હતો ?

ખુશી બધાની સાથે પ્રેમથી ભળતી. એને મન કોઈ નાનું કે મોટુ ન

હતું. વર્ગના બાળકો પણ તેની મિત્રતા ઈચ્છતા. તેનો નાનો ભાઈ

તો હમેશા તેની આજુબાજુ આંટા મારતો. ભણવામાં પહેલો નંબર

આવતી. તેના મિત્રો સલાહ લેવા પણ આવતા.

સાતમાં ધોરણમાં આવી. બન્ને ભાઈ અને બહેન પપ્પાની દેખરેખ

નીચે ફટાકડા ફોડતા હતા. ખુશીને અને તેના ભાઈને દિવાળી ખૂબ

ગમતી. ખાવા પીવાની મજા. ફટાકડા તો રોજ ફોડવાના. નવા નવા

કપડાં મમ્મી લાવી આપે, ખુશીનો વટ પડે.

આજે બન્ને જણા ‘કોઠી’ ફોડી રહ્યા હતા. અચાનક આડી પ્રગટી.

ખુશી દોડવા ગઈને ઠેસ વાગી. છાતીથી ઉપરના ભાગ પર દાઝી

ગઈ. દોડીને પપ્પા ડોક્ટર પાસે લઈ ગયા. પણ સખત દાઝી હતી.

મોઢાનો નકશો આખો ફરી ગયો.

જે ખુશીને જોઈ સહુ ખુશ થતા હતા સહુએ તેનાથી મોઢું ફેરવી

લીધું. ભાઈ અને માતા તેમજ પિતા સિવાય આખી દુનિયાએ જાણે

ખુશીથી મુખ મોડ્યું. એના ભાઈને અનહદ દુઃખ થયું. બહેનના મુખ

પર મુસ્કુરાહટ જોવા તે અધિરો થઈ ગયો. બહેન તેને ખૂબ પ્યાર કરતી

તેને થતું ‘હું શું કરું મારી બહેન પાછી ખુશ થાય અને આનંદમાં રહે’.

અચાનક તેને બારણે આવતો ‘ગોટિયો’ યાદ આવ્યો. બંને ભાઈ

બહેનને ગોટિયો ખૂબ ગમતો. પોતાના ભાગની રોટલી તેને પ્યારથી

ખવાડાવી નાચતા. આજે ગોટિયો આવ્યો. તેના ગળે પટ્ટો બાંધ્યો.

ગોટિયાને થયું આજે સરસ ખાવાનું મળશે. નાનકો તેને ખુશીની

નજીક લાવ્યો.

ભલે ગોટિયો ગલીનો કૂતરો હતો. આ બંને ભાઈ બહેન તેની સાથે

હંમેશા ખૂબ મસ્તી કરતાં. તેને માટે બિસ્કિટ લાવતા. તેની સાથે

બોલય્હી પણ રમતા હતા. શાળાએથી અવે ત્યારે ગોટિયો તેમની

રાહ જોઈને ઉભો હોય.

આજે ગોટિયાને લઈ તેનો ભાઈ આવ્યો ત્યારે, ખુશી જમી રહી હતી.

ગોટિયાને બે રોટલી આપી. ગોટિયો ખુશ થઈ ગયો. ખુશીના મુખ

પર ચમક આવી. નાનકા એ ગોટિયાને નવડાવ્યો અને ચોખ્ખો કરી

ખુશી પાસે ગોટિયો પણ સમજી ગયો. આમ પણ એને ખુશી અને

નાનકો ખૂબ ગમતા. પાળેલા કૂતરા જેવી માયા થઈ ગઈ.

ખુશી પ્રેમ પૂર્વક ગોટીયાને શિખવી રહી હતી. મમ્મી અને પપ્પાએ પણ

કોઈ વાંધો ન લીધો. ખુશીની જીંદગીમાં વળાંક આવ્યો. જલ્દી સાજી થઈ

ગઈ. શાળાએ જવા માંડી. ગોટિયાને દરવાન પાસે બેસાડી વર્ગમાં જતી.

સાંજે ઘરે આવતા ગોટિયોને ખુશી નચતા નાચતા, ઘરે આવતા.

ગોટિયાના પ્રેમે ખુશીને ચેતનવંતી બનાવી. મિત્રો સાથ આપે કે ન આપે

એક મુંગા પ્રાણીએ ખુશીની જિંદગીમાં ઉમંગ, આનંદ અને ઉલ્લાસ

ભરી દીધાં. બહેનન ખુશ જોઈ ભાઈને અતિ આનંદ થયો.

મુંગા પ્રાણીનો અપેક્ષા રહિત પ્રેમ. વફાદારી તો તેની જ !